Note: This database is re-populated every day at midnight, Eastern Standard Time. Information in this database may become unavalable for approximately 10 minutes while this process completes.
T-S 10J15.33
Editor: Ed. Moshe Gil, In the Kingdom of Ishmael (in Hebrew) (1997), vol. 4.
Library: CUL
Type: Letter
1 כתאבי יאכי אלעזיז עלי אטאל אללה בקאך ואדאם סלאמתך וסעאדתך ורעאיתך וכפאיתך וזאד מן
2 פצלה ואחסאנה לדיך ועליך לו . . . כלת מן אדר ראשון מן אחואל כמא קצי אללה עז וגל ואנת
3 תקף עליהא מן כתב אצחאבנא אסל אללה אלפרג ברחמתה בוגה אן ירא וקד כאנת קלובנא משגולה
4 מן גהתכם אלי אן וצלו אלפיוג פי יומנא הדא ידכרו וצולכם סאלמין ללה אלחמד עלי דלך
5 . . . . . יאכי סאלתך פי אלאגתמאע מע כיאר ותכאטבה ואועדת אנך תפעל פי הדא מא תסרר
6 עליה וקלבי מתעלק לוצול כתאבך במא עמלתה מעה לא עדמתך ולא כלות מנך וכדלך
7 מא אועדת בה מן אלאגתמאע מע אלשיך אבו הרון פי מא בקי לי ענדה פארגו אנך עמלת
8 גמיע מא סאלתך פי תדכרתי ואן הדא וגירה ממא תסרני בה אן שא אללה פמא נחתאג נוכד עליה
9 היא תחת עלמה יאכי מא כפי ענך מא גרי עלי מן בן פרח אלפאסי וטלבה לי מן מות ואלדי
10 רחמה אללה אלי אלסעה ומא תכלם פי במצר ורד אללה כידה בנחרה ואפתצח ענדהם ואנכשף
11 להם חאלה פמצי לשיך אבו אלחסין אלמבארך בן אסחק וחמאה עלי חתי געלה וכל עליי
12 בן אלנכאץ וגא וסמע כלאמי וכאן אפצל מנה ועלם אן הו אלדי חרך עלי פלם יכפאה הדא
13 אלי אן וכל עלי ברכאת כגוב פי מא כאן לשירגי ענדי לאנה כאן סאלה אן יתוכל עלי חתי יקבץ
14 מני שי בעד שי פקאל לה מא נרצא לנפסי נכון וכיל אנמא תכתב לי אלמאל אנך קבצתה מני ואנה
15 צאר לי פסכר בה אלי אן פעל לה הדא פלמא מאת אלשירגי טלב הו אן יכון יורש וקאל אן אנא
16 וזנת הדא אלמאל פאתביין לנאס כסת דינה ו[ . . . ] עליה וקאלו כאן ענדה מן אלמאל חתי ועש
17 לשירגי מאל יקבצה פי ג סנין ונחן כל יום פי כלאקה ומושב ואלי אלסעה לם ינפצל לנא חכם
18 פרד אללה שרה בראסה וכפאנא מונתה כל מא נעאמלה באלגמיל יעאמלני כל קביח ישלם
19 ייי לעושה הרעה כרעתו פאן דכלת לענד סאדאתי אלשיוך חרסהם אללה תערפהם דלך וכדלך
20 לסידי אלשיך אבו אלפרג וגירה ומא נחתאג נוכד עליך שי פי גמיע מא פי תדכרתי ויצל אליי
21 כתאבך משרוח באחואלך וגמיע מא נחתאג אליה ואלסלם עליך ורחמת אללה ואסחק יקריך אלסלם
אכי אלעזיז עלי . . . . . ברהון ביר מצליח ננ מן יחיי בן מוסי לע
תיהרתי
.ו]אנעאמה אטאל אללה בקאה ואדאם סלא[מתה