T-S 13J23.14

Letter from Abū Zikrī Yehuda b. Yosef (active 990s–1030s CE), in Qayrawān, to his brother-in-law ʿAyyāsh b. Nissim. The sender reports that the addressee's son is doing well, reports on the success of another relative (Abū l-Surūr), discusses business transactions, and asks for medication for his eyes (something Indian, "the white kind . . . ostrich eggs, and the green kind, because I need to use it on my eyes"; line 15). Information in part from Gil. ASE
Editor: Ed. Moshe Gil, In the Kingdom of Ishmael‎ (in Hebrew) (1997), vol. 2. Mislabeled there as T-S 12 J 23.14; also ed. S. D. Goitein, unpublished editions. With minor emendations by Alan Elbaum (2020) https://princetongenizalab.github.io/goitein-notes/5D.2.2%20-%2013J%20%2819-24%29_%20pt%202/T-S%2013J23.14%20%28PGPID%203348%29.pdf.
Library: CUL
Type: Letter
Tags: illness letter 969-1517 illness: eye mail-order medicine illness illness: treatment
1 אטאל אללה אכי וסידי אלעזיז עלי בקאך וחפצך ווקאך ואדאם נעמאך
2 כתאבי אליך ערב צום כיפור תקבלה אללה מנא ומנך ומן כל ישר באלגפראן ואלרצואן
3 ען סלאמה ועאפיה ואחואל מסתויה עלי אפצל עואיד אלבארי גל ועז ואכבר פואידה
4 נחן וסאיר גמאעתנא ולה אלחמד כתירא וכדלך ולדך צדקה סלמה אללה ואלאהל וכל
5 מן כלפתה עלי אפצל מא תעלמה וזאיד ואן ולדך חרסה אללה פי זיאדה ואקבאל כל
6 יום וקד גא מנה רגל כביר תאגר באזל יטמע לה אן יכלפך ויזידך ל . אה. . .
7 וקד כאן תקדמת כתבי אליך מע אבי יעקוב יוסף בן מטרוח סלמה אללה ושרחת לך פיהא
8 כל מא תחתאג אלי[ה מן אל]אמורי ומא קד וצל אלי כתאב ואלדה צדקה או . . . . . . . ה
9 אבנה אבו אלכיר סלמה אללה וקד תסלמת(?) עלי דלך ואנ . . . ת אלקצה ו . . לת אלנפוס
10 אלי בעצהא בעץ ל[כן]ן [ל]ם ימכן תמאמהא אלא ענד חצורך חרסך אללה ארגו אן יכון
11 דלך קריב ויסאהלה עליך וכנת כתבת אליך אן יכון תעמל עלי כל מא בקי מעך מן אל
12 חמל מא ראיתה צלאחא ויכון פיה פואידה ותוגה בדלך פארגוך קד פעלת דלך
13 וסאלתך יאכי וסידי אן יכון תשתרי לי רבע מן כאפור שרבזי עאלי רפיע ומן אל
14 תותיא אלהנדיה אלאצליה אלרפיעה מיתקאלין מן אלביצה אלתי מן אלקשור ביץ אל
15 נעאם ואן אלכצרה אלגידה אלרפיעה איצא לאני אחתאג אסתעמלהא אלי עיניי
16 ומן אלכאגט אללטיף מתל הדא אלגנס ה אלאף ורקה חסנה ומן אלטלחי אלף ורקה עליה
17 ומא תקדם בה כתאבי מן אל [[כתב]] חואיג אלדי קד נסיתהא ולם נדכרהא פי הדא
18 אלוקת וליס אנת סלמך אללה תחתאג ממן יוציך עליהא ואבי אלסרור פקד כאנת
19 לה ספרה חסנה מגברה וקד קיל לי מן נצדק קולה אנה ירבח ללדינ דינ //פי אלקמח// פי הדה
20 אלספרה אד כאנת לה מבארכה ואלחמד ללה זאדה אללה מן כל כיר וכנת יאכי
21 אכדת עליך פי אמר אבו זכרי בן אלאקטעינא(?) סלמה אללה באן תגתמע בה פי מא
22 לנא ענדה ותכפ[יה] אלמונה פי הדא פלם נרא לך עליה כתאב פלא תגפל ענה
23 . . . . . . . .אנ. . . . . . . . . . פי הדה אלדניא כאן אחסן לה ואעפא ואכלץ וקד נצחת
24 פי] הדה אלבארי גל ועז עליה וכתאבך לא תוכרה בגמיע אלאמור כלהא
25 . . . . . . .א ואעלמהא וכתבת עלי סרעה וקת דכול אלנאס אלי אלמרכב
26 פי הדה אליום סאהל אללה עליהם וכתב סלאמתהם וסלאמה כל ישראל אמן
27 ואלסלם עליך ורחמת אללה וברכתה ואלצביאן אגמעין אגמעין וכואתך אלסלם
28 והם באלקירואן עיידו מע אהאליהם עלי אפצל חאל סלמהם אללה כתירא
29 ומן . . . . . . . . . . . . . . .
Verso.
1 לאבו אברהים אכי וסידי אטאל אללה בקאה הו(?)
2 עיאש בן נסים בן ברוך סלמה אללה
1 מן יהודה בן יוסף נע