Note: This database is re-populated every day at midnight, Eastern Standard Time. Information in this database may become unavalable for approximately 10 minutes while this process completes.
T-S 13J26.10
Editor: Ed. Moshe Gil, In the Kingdom of Ishmael (in Hebrew) (1997), vol. 4; also ed. S. D. Goitein, unpublished editions https://princetongenizalab.github.io/goitein-notes/5D.1.2%2013J25-37_%20pt%201/T-S%2013J26.10_1%20%28PGPID%203379%29.pdf; also ed. S. D. Goitein, unpublished editions https://princetongenizalab.github.io/goitein-notes/6C.1.1%20Mediterranean_%20vol.%20I/T-S%2013J26.10_2%20%28PGPID%203379%29.pdf.
Library: CUL
Type: Letter
Translation:
1 ואמרתם כה לחי ואתה שלום וביתך שלום וג
2 ייי ישמרך מכל רע ישמור את נפשך
3 ייי ישמר צאתך ובואך מעתה ועד עולם
4 חצרה אכי וקרה עיני וסיידי ורייסי וגלילי ותאג ראס ומן בה עמדי אטאל אללה פי אלכיר בקאה
5 וצאנה ווקאה ומן חסן אלתופיק לא אכלאה אלדי נעלמך בה יא אכי סלמך אללה ולא אסלמך
6 וכאן לך עוזר וסומך משען ומבטח מעתה ועד עולם אני דכלת אלי סקליה באהלי מן תונס
7 מן ציקת אן גרת עלי ושדאיד אן ראית פי אפריקיה וכתרת אשתיאקי אליכם פקלת לעל[י
8 נחצל פי סקליה נדכל מן תם אלי דיאר מצר לאן אפריקיה מא בקי פיהא צפר(!) אלי דיאר מצר
9 ומא כנת יא אכי מעוול אלא עלי אלמגי אלי דיאר מצר פי הדה אלסנה פשא אללה תעאלי
10 אן א[ע]אקני עאיק ען אלסיר ואלוצול אליכם והו אן אהל אלדאר מרצת ואקאמת ד שהור
11 וחק דין ישראל מא אקאמת חרכתי אלא בנ דינאר מראבטיה לאן מרצת אלמראה
12 ואלאטפאל אתנין ושא אללה אן תופי ואחד מנהם והו אלצגיר וכאן עמרה סנה ונצף
13 ולך טול אלבקא תם אן גרי עלי פי דכולי אלי צקל[י]ה(!) חרכה מא ראית מתלהא קט
14 אכדנא נין עטים פי אלבחר ודכלנא אלי גזירה יקאל להא אלגמור ואקמנא פיהא כ יום
15 וליס כאן לנא מא נאכלו פיהא גיר אלחוריק חתי כרגנא מנהא ונחן פי גיר צפה
16 בני אדם ואקמנא תמנתנא אלבחאר לה יום וכנא ענד אלנאס מפקודין [[לאן]] וכנא
17 מפקודין ענד אלנאס לאן [א]קלענא ד קוארב מא כלץ מנהם גיר קארבנא וחק הדה אל
18 אחרף מא אקמנא פי סקליה נחו שהר מא נקדרו נאכלו אלכבז ולא נערפו מא יקאל
19 ממא גרי עלינא פי אלבחר פהו אלדי געלני לם נגי אלסנה אלי דיאר מצר ולם תסאעדני עלי
20 אלמגי אלסנה ממא גרי עליהא וליס אלכבר כאלעיאן ואכרי אן לי אליום ג סנין מא ראית
21 מנך לא כתאב ולא גואב פאשתגל קלבי עליך והו אלדי קצרני ען אלמגי ואלסעה יא אכי
22 אללה אללה לא תקטע כתבך עני לאני מנתטר אלי כתאבך ואנא פי סקליה סאכן לא תקטע
23 עני כתבך אללה אללה מעי מן יגי לאני מעלק אלקלב אליך כתיר משגול אלסר מן וקת
24 אנקטאע כתבך עני ואכתב לי עלי מסאלת אלגזייה ואן כנת מתחרך פדלך אלי
25 סקליה אפצל לאן צקט אלמשרק באיע כתיר פתגעלהא נזאהא ותגארה ונתעאונו
26 פי רפוע אלאהל ונגדו ראחה לבעצנא בעץ ותכץ נפסך אלשריפה באפצל אלסלאם
27 ותכץ אלשיך אבו אלמנגה(!) וולדה אפצל אלסלאם ואלשיך אבו עלי אפצל אלסלאם
28 ואלשיך אבו אלמנצור אפצל אלסלאם וכאלאתי אפצל אלסלאם וגמיע מן
29 תשמלה ענאיתך ותחוט בה רעאיתך אפצל אלסלאם וכתב אלכתאב
30 יום ראש חדש סיון ואללה אללה מא תחתאג וצאיא פי אלגואב מסרע אן שא אללה
31 ואלסלאם עליך ורחמה אללה וברכאתה ושלומך יגדל לעד ולא ידל אמן
32 וולדי אבו אלחסן יקריכם אגמעין אלסלאם ואהל דארי תקריכם אלסלאם צגיר וכביר
1 . . . .]. . אכי . . . . . . . . .[. . . . . . . . . . .] מן אכיה אל[משתא]ק אל[יה
2 . .]. . ושקיקי אבו אלברכאת בר כ[בוד א[בו] סעיד בר [אבו אלחסן
3 אבא מ]רי [הי]דוע אלאבזארי [. . . . . . . .].[. .]ר. . . . . . .[. . .] אלאבוזא[רי
4 . . . .]יר אלי מצר אן ש[א אללה [. .]. .[. . . . .]מו[. . . . . . . . . . . . . . . . .