Note: This database is re-populated every day at midnight, Eastern Standard Time. Information in this database may become unavalable for approximately 10 minutes while this process completes.
Halper 411
Editor: Ed. Moshe Gil, Palestine During the First Muslim Period (634–1099) (in Hebrew) (1983), vol. 3; also ed. S. D. Goitein, unpublished editions https://princetongenizalab.github.io/goitein-notes/6B.2.2%20Dropsie%20Transcripts/Halper%20411_2%20%28PGPID%204431%29.pdf; also ed. S. D. Goitein, unpublished editions https://princetongenizalab.github.io/goitein-notes/5C.1.2%20Nahray%20101_%20pt.2/Halper%20411_1%20%28PGPID%204431%29.pdf.
Library: CAJS
Type: Letter
1 אטאל אללה יאסידי בקאך ואדאם סלאמתך וסעאדתך וכאן לך ולי פיך
2 ולייא וחאפצא במנה ופצלה כתאבי אליך מן אלוטן אלמקדס ואלמוצע
3 אלמפצל יומ אלה יא בקין מן אייר ען חאל סלאמה ונעמה למולאי אלחמד
4 וען שוק שדיד אליך קרב אללה אלגמע עלי אפצל חאל במנה וגודה תקדמת
5 לי אליך כתב עדה ומא ראית להא גואב וקד כאן וצל אלי כתאבן בתאריך
6 אול ניסן תדכר אנך עלי אלאנחדאר ללאסכנדריה ובקי קלבי מתעלק אלי
7 וצול כתאבך בוצול אלטבארה אלדי כתבת ללמגרב אליך פוצל אלי
8 כתאב סידי נתן בן ששון אלמגרבי ידכר אנה אפדאהא מן אלכתבי
9 וארסלהא אלחנן צהרה מע כתבה ללאסכנדריה וארגו אנהא וצלת אליך
10 אלי אלאסכנדריה ואנפדתהא וכתבת לסידי אבו אסחק ברהון בן יצחק
11 במא אסלתך פי כתאבי אליך וכנת דכרת לי קדום מולאי אלשיך
12 מר רב משה אלינא בעד פסח ואלי אלאן לם נסמע לה כבר וקלובנא
13 מתשופה נחוה אללה יכתב סלאמתה ויגמענא עלי אפצל חאל ודכרת
14 וצול כתאבי בדפע אלדנאניר לבן זרגאז ואנה מא וצל וקד כאן עלי אלסיר למצר
15 מן אול אדר שני פסאלני סידי אבו יעקב ואלדה פי חאגה אלי מצר פסאלתה
16 יקבץ מנך //ולדה// הדה אלדנאניר ויכתב אלי ואלדה ידפעהא הנא פכאן מן
אלתעדיר
17 אן כתנה חבסה באלרמלה חתי יעיד אלפסח ואלי אלאן הו באלמוצע
18 תם וצלת אלספתגה פסאלה ר אברהם יקבצהא באלרמלה וידפעהא הנא
19 פלמא תאכר ולדה ען אלנזול אסתופי מא קד כאן אקרצהם פי ופאה
20 יהודה נע ואלנחאס וצל בן נחמן מן אול ניסן ורגבת אלי אבו יעקב
21 יוסף יכתב אלי ולדה יקבצה ואלי אלאן מא יצל מנה כתאב בקבצה
22 פאסל אללה תעאלי יתפצל ברחמתה ויסאהל באלמגותה ואלפרג ואמא
23 חאלי יאסידי פי מעישה אלמוצע וציקהא מא יכאד אן יכפא
24 ענך אד הוא משהור וישכו בה מן יקדר לנפסה בקוה אלגסם
25 ואלמאל פכיף מן עדם אלחאלין גיר אנה רב אלבית תעאלי קד
26 מכן מן אלנפס אלאלתדאד ואלסרור ברויה אלמוצע אלמקדס
27 ומן אלגסם ברויה אליסיר כתיר ואלתגלד עלי אלמצץ ואלמשקה
28 ללכון בין ידיה פי אלמוצע אלדי אכתארה והו תעאלי אלקאדר אל
29 מתפצל באלפרג ואלמגותה קריב אן שאללה ומא נחתאג נוסע לך
30 אלשרח ואנא נרגו אן כתאבך יצל אלי מן מצר קבל וצול כתאבי הדא
31 אליך באגובה כתבי אלמתקדמה אליך ובחאלך וסלאמתך פאן קלבי
32 וגנארחי אליך וענדך אסל אללה תעאלי יבלגנא פיך אפצל אלאמאל ויסמענא
33 ענך מא נסר בה ויתקבל מנא צאלח אלדעא לך פי הדא אל[מו]צע אלשריף
34 תכתץ נפסך אלשריפה אפצל אלסלאם וסידתי אלאכת תכצך אפצל אלסלאם
1 ואבו יוסף יכצך אפצל אלסלאם וארגו אנך אנפדת אלי גואב נסים
2 ור אברהם החבר ור שמעיה החבר יבלגוך אפצל אלסלאם
1 אכי וסידי אבו יהיי אטאל אללה בקאה מן משה ביר יעקב נע
يصل الفسطاط ان شاء الله
2 ואדאם תאיידה ונעמאה
3 נהראי בן נסים נע אללה וליה
1 يصل الى نهراي بن نسيم
2 المغربي من موسى بن يعقوب
1 الحسين بن عبد الرحمن نجا بن الحسين اﻻنصاري